Ti ringrazziu patri miu pi lu beni ca mi dasti,
pi li gioi di picciridda ca ogni ghiornu assapurava,
la to manu granni e forti, 'nta li strati di la vita,
passu passu mi tinia.

Quantu beddi siritini 'ncapu a conca
'mbrazza a tia,
mentri c'ascutava u cuntu
e accussì m'addurmiscia.

Ti ringrazziu patri miu
di li lacrimi asciucati
cca ducizza d'un surrisu e i carizzi
ca pusavi, mentri u sonnu mi cuglia.

Grazzie ancora patri miu, pi la spadda sempri lesta,
unni m'appuiava a testa,
mi manca assai la tinirizza, u caluri di l'abbrazzu,
quannu u cori s'ascurava e a tristizza cumparia.

Cercu sempri u to pirdunu pi l'amuri mai mustratu,
quannu mi l'addumannavi,
mentri assicutava u tempu ca di manu mi sgriddava
e tu 'mpunta di li pedi chianu chianu mi lassavi...